Che bèla Brèssa che la fa la strolega
con chel fa spiritus de mercandèla.
Brèssa en sotana col mantèl de pés
sóta le tresse de “zuchero filato”.
Brèssa en camìza, töta véi e sfranze,
da Porta Pile en zó finafinorum,
la strèns ne la sintüra e nei butù
en fiöm de ciciarade e de cansù.
-El ché anche lü?- Permesso…tóca a mé -
-Delamadoi…che rassa de puciù!-
-La scüse siura, la se tire en banda.-
(Scapa en balù nel ciel de cartulina)
-Vòi la cavrina, miga la lavanda!-
(Chilometri de gnari e e de caprésse).
La sera la streàca sö la Loza
aria giassada e sternüdà de stele
che sè spipiula al föm de le salsesse.
Colane de biscòcc e lampadine
tacàde al fil de fèr de le banchète
le sè dindùla belaze belazì...
Brèssa la dorma en bras a san Faüstì.